20 АФОРИЗМИ ЗА ЖИВОТОТ.. SVETO STAMENOV

 

Macedonia
-Дојде такво време во кое секој се фали со своите гревови, а скромноста остана единствената доблест со која не смееш да се пофалиш,бидејќи веќе не си скромен!
-Простувањето не може да го избрише минатото, но може да ни помогне да ја изградиме иднината!
-Понекогаш воопшто и не треба да ни биде важно што говориме, туку што сме слушнале и научиле од другите!
-Некои никако да го направат историскиот исчекор од дивјаштво во цивилизација!
-Никогаш не суди за она за што немаш поим, бидејќи и најголемиот глупак ќе "испадне" попаметен од тебе!
-Секој, сакал или не, е човек, ама ретко кој и личност!
-Ако сакаш да му ја дознаеш вистинската вредност ѕирни му во срцето, а не во џебот!
-Ми остана уште да си простам самиот на себе оти побарав прошка од другите!
-На многумина не им е јасно дека нивниот општествен статус подразбира и одговорност за јавно изречениот збор!
-Таму сме каде што сме и вакви сме какви што сме само затоа што формата ни е побитна од суштината!
-Секаде времето чини пари, а само кај нас денгубењето е "божји благослов"!
-Само на ѕвер со човечки лик несреќата на другиот може да му биде душевна храна!
-Само на ветриштата и на човечката глупост дури ни небото не им е граница!
-Од нас можеби и ќе биде нешто, но само тогаш кога делата, а не зборовите ќе говорат за нас самите!
-Меракот голем, ама пусти чалам уште поголем!
-Ех, барем ние можеме да се пофалиме барем малку со какви - такви „стари времиња“, а со што ќе се пофалат нашите деца?
-Кога конечно ќе сфатиш дека не си само тажна приказна, светот ќе биде твој!
-Во животот сè си има свое место и време, а нам ни останува само да се надеваме и да се молиме дека и нашето конечно ќе дојде!
-Самите себе си сме си најголеми душмани, а другите се само концерт - мајстори на нашиот реквием!
-Најтешките работи во животот имаат и најголема вредност!