20 АФОРИЗМИ ЗА ЖИВОТОТ - II.. SVETO STAMENOV

 

Macedonia

-Во животот сè си има свое место и време, а нам ни останува само да се надеваме и да се молиме дека и нашето конечно ќе дојде!
-Кога конечно ќе сфатиш дека не си само тажна приказна, светот ќе биде твој!
-Јас не живеам соживот, туку живеам живот со сите ЛУЃЕ, а за НЕЛУЃЕ во него нема место!
-Понекогаш воопшто и не треба да ни биде важно што говориме, туку што сме слушнале и научиле од другите!
-Воопшто не е важно колку луѓе ќе прошетаат низ твојот живот, туку каква трага ќе остават!
-Сите си имаме своја ѕвезда, но дали таа ќе блесне зависи исклучиво од нас самите!
-Во историјата, па и во животот, нема ако, туку како!
-Таму сме каде што сме и вакви сме какви што сме само затоа што формата ни е побитна од суштината!
-Не, не си патиме од главата, туку од она во неа!
-Од сите негови негативности, единствено позитивно е што е негативен на короната!
-За многумина речиси цел живот сум само обична енигма, ама за некои, сакале или не, станав дури и парадигма!
-Чинам добри дела не заради некој да ми биде благодарен, ама сепак убаво е кога понекогаш некој ќе каже едно обично фала!
-Биди чесен кон самиот себе за да бидеш уште почесен кон другите!
-Сакале или не, она што некогаш било аспирација и „поезија“ еден ден станува обична проза!
-Историјата на човештвото всушност е историја на војни и страдања, а не на мир и благосостојба. Па, ако си немате друга работа, буричкајте и понатаму по неа!
-Ќе нè биде само тогаш кога конечно ќе успееме да се одбраниме од самите себеси!
-Понекогаш денот ми е ко година, ама затоа пак годините отсекогаш ми биле денови!
-Од нивната бескрајна „грижа” за нас животот ни стана нешто што мораме да го издржиме!
-Е, мој друже, животот е само еден огромен смрдлив неред, ама токму во тоа е и неговата убавина!
-Чудно е да се верува во чудо, ама само оној кој верува во чудо чудо и прави!