ТАМУ КАДЕ ШТО СОНИШТАТА ЦВЕТААТ… Олга Наумовска

 

Те пронајдов зад завесата од тивки виденија,

каде утрата се раѓаат од мирис на див босилек,

а ветерот ги чува тајните на вљубените

во школки расфрлани по брегот на копнежот.

Твојот поглед беше птица без граници,

што слета на моето немирно срце

и од секој негов трепет

создаде градина полна со незаборав.

Низ твојата насмевка минуваа пеперутки,

обоени со бои што никој не ги именувал,

а јас ги собирав како ретки бисери

во најскриеното катче на душата.

Не ни требаа зборови.

Доволно беше тишината да нè допре,

па целиот свет да стане

една непрочитана љубовна приказна.

Ако некогаш исчезнат сите патишта,

јас повторно ќе те најдам –

таму каде што соништата цветаат

и љубовта никогаш не го губи својот мирис.

С.Македонија🇲🇰