SVETO STAMENOV.. Sveto Stamenov

ГОЛЕМИ МИСЛИ ОД МАЛИОТ МОЗОК
-афоризми-
-За многумина речиси цел живот сум само обична енигма, ама за некои, сакале или не, станав дури и парадигма!
-Остана уште да си простам самиот на себе оти побарав прошка од другите!
-Не, не си патиме од главата, туку од она во неа!
-Толку мала земја, а толку многу лудаци!
-Многумина љубовта кон татковината ја платија со глава, а не се малку ни оние што дебело си ја наплатија во евра!
-На многумина не им е јасно дека нивниот општествен статус подразбира и одговорност за јавно изречениот збор!
-Таму сме каде што сме и вакви сме какви што сме само затоа што формата ни е побитна од суштината!
-Ако сакаш да му ја дознаеш вистинската вредност ѕирни му во срцето, а не во џебот!
-Душа стегната ко пет пари во ќесе, ама јазик по земја се влече!
-Меракот голем, ама пусти чалам уште поголем!
-Секаде има глупаци, ама како кај нас на квадратен метар, бога ми, никаде!
-Ех, барем ние можеме да се пофалиме барем малку со какви - такви „стари времиња“, а со што ќе се пофалат нашите деца?
-Верувај им на очите, а не на ушите!
-Понекогаш воопшто и не треба да ни биде важно што говориме, туку што сме слушнале и научиле од другите!
-Лесно е да си луд во нормална држава, ама ај’ биди нормален во луда држава!